الصديقة " دينا حسني " تكتب لنا عن رمضان

السلام عليكم شباب وبنات
اول حاجة كل سنه وانتم طيبين و ربنا يعودها علينا بالخير و اليمن و البركات ان شاء الله بمناسبة ان رمضان قرب
ورمضان كريم علينا كلنا ...

الحقيقه بعد النظر علي حجات كتير و مواقف بتحصل حوالينا في رمضان طبعا.. لاقيت حجات عجب يعني بتحصل

حجات بمعني اصح بتغيظ

و هتكلم عن كذا حاجه .. انا شيفاها و غيري كتير شايفها انها حاجه تشل يعني!

البنات في رمضان


في تصرفات انا نفسي شيفاها تغيظ جدا.. في رمضان البنت بتتحجب و تتدين و تعرف ربنا و تختم القرأن و تبقي قريبه من ربنا جدا

تخاف انها تكلم ولاد..تسمع عمرو خالد ليل و نهار..تقعد في بيتهم عشان قال ايه مفيش حد يبصلها !

و طبعا في نماذج كتير من النوعيه دي..

تيجي بعد رمضان بقي العيد.. رمضان خلص و انهارده اول يوم العيد يلا ننزل نشتري هدوم العيد

و تلاقي حجات متتشافش اصلا.. يا بنتي ما بتصليش ليه و قلعتي الحجاب ليه؟! .. لاء الحمدلله انا عملت للسنه دي ..و ربنا يغفرلي , يا شيخه؟

دي اول عجيبه من عجائب رمضان اللي بنشوفها و بتتكرر كل سنه تقريبا.,


و الشباب في رمضان


طبعا مش هنتكلم علي البنات و نسيب الشباب..ده حتي يبقي ظلم

ايه اللي انت عامله في شكلك ده؟! مربي دقني و شعري عشان سنه
رايح فين؟! نازل اصلي الفجر في الجامع
كنت فين كل الايام دي؟! اصلي كنت معتكف في الجامع مع جماعه اصحابي
قاعد لوحدك ليه؟! بحاول امنع نفسي عشان متفرجش علي التلفزيون و مسمعش اغاني و مبصش علي البنات

كل ده جميل.. و اي حد يتمني يبقي كده..و ياريت يبقوا كده

طبعا ده كله في رمضان بس.. و بعد او قبل رمضان..عينك ما تشوف الا النور

في نموذج تاني من الشباب و البنات كمان يعني .. بس يمكن الشباب اكتر

هو اللي ميبصش علي البنات قبل الفطار و ميكلمش صحبته قبل الفطار.. ميشتمش او يقل ادبه علي صحبه او علي اهله بردوا قبل الفطار!

يجي بعد الفطار بقي يلا احنا فطرنا و ربنا هيغفرلنا.. يلا بينا اشطه علي خيمه رمضانيه تجنن و فيها رقاصه موزه جدا

يا راجل؟؟؟

نيجي للناس اللي هما تلاقي أمرهم عجيب جدا.. يقولوا احنا في رمضان دي فرصه جميله اننا نتقرب من ربنا
و ربنا يقدرنا و نفضل كده..و منرجعش للي كنا فيه

و احنا توبنا خلاص الحمدلله.. و هنصلي وننتظم و و..

جميل..و بعدين؟

قبل الفطار مش هنسمع اغاني ولا هنتفرج علي التلفزيون.. بليل هنصلي التراويح و قيام الليل و مش هننسي نصلي الفجر و نقرأ قرأن

و بعدين بردوا؟

بعد رمضان يعني ممكن نخف ده شويه عشان بردوا ساعه لربك و ساعه لقلبك

طيب يا عم الدين يسرها علينا كلنا..

يفضلوا كده لحد ما يخلص رمضان.. بعد رمضان ..نسوا يصلوا انهارده..معلش هنصلي بكره و ربنا يسامحنا..

و يفضلوا يأجلوا.. طب هو ربنا سبحانه و تعالي أجل نعمته عليك؟
قال لاء بكره و بكره..

ده ربنا بيفرح لما بيلاقي عبد من عباده بيتزللوا و يطلب مغفرته

تيجي انت تعمل كده!

رمضان علينا نعمه .. و فرصه مش ممكن تتعوض

و محدش ضامن عمره امتي و فين و ازاي هيخلص

و الشباب و البنات ربنا يهديهم..و مش هقول انا اللي خلاص يعني..انا كمان يارب ربنا يهديني

و اسفه لو طولت عليكو..


" الكاتبة دينا حسني "